Bulan Gerring Pesse Panas

 

Bulan Gerring

 

 

Mon lamba' bulan gerring embu' ngolo' ana'na

Juju' nyengceng samper nokthok battonna lencak

Paman buru ka kandhang ajagai ajam

Se ngandung soro nyono' ka babana baruma ngengke' kapak

Se teppa'na tedung jaga abaladhas

Akompol e taneyan padhana tellor teddhas

 

Jaga ate

Mella' ate

Bulan gerring ebadana mate

 

Sonarra kare saparo

Sagarana mera menta sapora

Astaghfirullah kaodhi'an tamba tajarungngep

Astaghfirullah pera' mandhar ta' nongngep

 

Sateya bulan gerring

Reng-oreng gun adharing

Dhalluwan statussa se eguring

Wa-duwana paggun elorba garing

 

 

Robana la ngantang mera

Bajanganna cora' lebur potowanna

Caption-na ngala' e TikTok-ka

Bila mare pas ako andhi'na

Haha.. enja' mon manossa sateya

 

 

Kolor, 08 November 2022

Maos jugan

• carpan: Mamat Terro Nompa’a Jaran
• carpan: Labang
• Sajan Abit Oreng Atane Sajan Tadha'
• Madhurâ ḍâlem Kaca Sajhârâ
• Agi’-gigi’ Sangngarra Jagung 

 

Bagiyan dhari Panyake'

 

Enga' apa'a bai gulina ba'na

Mon bantana oreng paggun badha

Ja' kose alako juba'

Tekka bagus sakale paggun badha se ta' endha'

Nyamana bai dunnya

Ya mon ta' eyaddu epatanya

Pajat la kapra colo' embir

Ta' ngenneng badha apa paggun ebir

Bida sakone' ecorne'

Mon nangale oreng kellar nae'

Esambat mandhar duliya takae'

Jat ta' nemmo teppa' ka bibir se cap pa'-lopa'

 

Ba'na sateya aguli sabadhana

Atengka sakencengnga

Poko' ta' sala ka Pangeranna

Ban ja' loppa amit ka reng towana

Mon gun tatangga cokop edhingagi

Se ta' genna buwang kepattagi

Senga' ja' kalonyot kabbi

Jarowa badha racon se agabay seddhi

 

Mon teppa'na lapar ecale

Bila etangale kennyang esare

Babatek se ta' kodu eteroe

Akaton tadha' kaleng mante'na sakale

 

Tatangga tor kadhang malegga

Keng ta' sakone' se maseksek ka dhadha

 

 

Malang, 23 Oktober 2022

Maos jugan

• Teks MC Bahasa Madura
• Okara Kakanten Basa Madura
• Parebasan Madura
• Carpan: Ngare' Padhi
• Obur Pornama Kaaddhangan Ondhem

 

Pesse Panas

 

 

Le-ollena ta' etemmo ja' dhari dhimma

Tor kadhang bannya'an lakona tembang ollena

Ta' tao ka ojan panas tar-kataran

Manggang bun-embunan tang-gentangan

Gan bila engganna nyaba

Gan dhimma bungana bala

Seddhengngan olle pas ngaseyap

Seddhengngan badha pas ebagi apsa'ap

 

Pola gan dhimma nganthang neyatta

Pola ana-barna tojjuwan sajjana

Ma' makalowarra ta' perna epekker

Ma' ngocolla langsung ngampar samper

Sampe'a bila se ko-ma’angkowa

Ja' na'-potona la padha towa

 

 

Mon gun matompessa pajat sakeddhebban

Ta' tao se mapolong dhala sondhebban

Pessena tompes ta' esolet

Pessena pelles padhana se ekakan ngetnget

E dhaporra ngebbul ko' kerreng

E babana terop cora' tadha' oreng

E taneyanna aserro karas

E adha'na panggung makalowar se ras-merras

E bengkona tekka’ pappa'an ekaroko'

Bila karja Surya ban Wismilak se epamaso'

Ana'na menta sombangan, ma' pesse malolo oca'na

Teppa' badha orkes electone-an, se nyawer dhala ka adha'enna

Mon badha amal ngoca' ta' andhi' pesse kene'

Mon epanyawerra nyellang se morop epakene'

Mon teppa'na e yamperra ta' ambu se aserrowan

Naleka nangdang se kalowar adhebbugan

 

 

Ta' ngarte ka jalan pekkeranna

Cora' se epaka'adha' gun ka-engko'-enna

Pessena epakaras onggu

Kala ka banta tako' ta' ekoca' teggu

Mon terros ta' kera burung se moros

Mon etorot paggun anggan koros

Sambi keba settel kopok

Kaodhi'an mon ce' sarana sellae tapok

 

 

 

Tambaksari, 19 September 2022

 

* Ajaz Elmazry (Ach Jazuli) aropa’agi Mahasiswa Pascasarjana UNISMA Malang, Pegiat Komunitas Ghai' Bintang Rubaru Sumenep. Alumni IAIN Madura paneka lebur tor andreng dhalem nyerrat sanja’, artikel, saenggana serradan epon bannya’ ngombar e media nasional. Samangken ka dhaja ka lao’ (Sumenep-Malang) asabab nyeppowe Komunitas Ghai’ Bintang sopaja ngongodhadan e disana lebur maos buku (Literasi).