Lalampan. 1444. Final Liga Ceker otaba amaen bal ta’
asaputuwan ampon lastare sadaja. Se menang enggi ka’dhinto PSDP B se dhari
Dusun Daleman. E Daleman badha balai disa tor juga dalem epon kalebunna.
Kalaban badhana pemenang ka’dhinto nandha’agi ja’ liga cekeran ampon lastare. E
laga kasebbut, antara PERSIP Palalangan sareng PSDP B Daleman sobung gol
sakale. Sanajjan tendangan epon santa’-santa’ namong sobung se maso’ ka gawang.
Sanajjan badha se mepet-mepet ka gawang, namong kadhuwana padha ontong.
Dhalem pertandingan paneka, wasit adil, apareng kartu
koneng pertama monggul ilur, nomor petto’ dhari PERSIP se neppak bal kalaban
tanangnga, koduna bal neka etempak, banne eteppak. Lastarena ganeka, Ilur ta’
pak-neppak bal pole, lalake’ se pon gadhuwan potre kasebbut paggun ngoser bal
pas e tandu’ sopaja bal maso’ ka gawangnga mamat (Ahmad, pajagana gawang PSDP
B). e gi’ buru amola, PERSIP andhi’ kasempadan nyaman, tape tandu’an mereng
asababbagi bal merong ke mor lao’.
Maos jugan
- Coma Bisa Esto
- Ancaman Krisis Mental Jadi Perhatian Utama
- Puisi Nailus Sururi Barisan Masa depan
- carpan: Mahbi Abine Pole
- Festival Tunas Bahasa Ibu
Oreng se nenggu sajan bannya’, parkir dhuibu ta’
ekarassa larang sakale monggu se andhi’ pesse, se ta’ andhi’ pesse enggala duli
alako. E bun bara’, bun lao’, bun temor, bun dhaja, possa’ kabbi, oreng nenggu
ebabana bungkana memba, tarebung, pet-taselpen, nyelket e kana perreng, ta’
loppa kana geddhang, gara-gara seggut eteggu’, daddi bergingnga. Are mangken e
Karduluk ta’ ojan, saenggana lapangan se cokelat (ta’ manes ban ta’ bisa
ejilat) ta’ bacca ban ta’ lecen. Senga ojan, lapangan sajan bacca, tantona maen
bakal laen. Pello paggun ngerray. Oreng se nenggu wak-kowagan adukung pamainna
se ka’-berka’ ban arebbu’ bal settong.
Kadhang pamaenna PERSIP etaja’, labu, nunggilang,
kadhang pamaenna PSDP B se nunggilang tabra’an, nyaman bai amaen bal, lakar
nyongsang nyonglet, nae’ toron, ka attas ka baba, nyerrang, toron, anyaba,
sopaja bal ta’ ka gawangnga dibi’. Pan-barempan kale offside (ta’ nemmo basa
Madura gi’an, dina pasabbar gallu, kala’ badhana), handball (ta’ nemmo keya
basa madurana, mon situ tao ka basa Madurana handball, langsung akomen ebaba,
malle lekkas jijib parembagan), banne handball se esangngaja akadiya neppak bal,
tape morni lakar bal nabra’ tanangnga otaba cengkolla.
Babak kapeng dhuwa’. PERSIP nyerrang dhari temor ka
bara’, PSDP B dhari bara’ ka temor, nomor lema’ ngoper bal ka budhi,
epajarabat, etandhu’ kaja ka gawangnga PERSIP se ejaga M1EF, pojur gi ta’ gol.
sakeng kaja tandu’anna. Reng-oreng pon asorak. Mon keeperra ta’ tennang, gaggar
tanto atena. Pojur gabayanna Pangeran. Banne gabayanna manossa. Maso’ bakto
aher, sadaja se amaen pon padha aserro. Gaja’ sabidak mennit bal settong
ebu’-rebbu’. Epamaso’a, tape gi’ ejaga sopaja ta’ maso’. La menemukan saja (nemmo
bai wa).
Maos jugan
- Sanja' Taresna, Helmy Khan
- Carpan: Andharun
- Sajan Abit Oreng Atane Sajan Tadha'
- Pantun Madura
- Mosem Panemor, Peragga Oreng Tane
Tandu’an dhari nomor lema’, se ekoca’ Yayan jat
marenges, ngatalbes, para’ onggu se maso’a ka gawang, keng se nyamana para’
paggun ekoca’ lambanna tange. Dineng se PERSIP laju pas ngamba’i malolo, sarana
parana se nemmowa bal kaangguy bisa nyerrang, buru kare sapolo mennit, katon
buru endha’ kalowar. Sobung gol sakale dhalem saejjam pertandingan. Kodu
elanjut kalaban adu penalty.
Dhalem adu penalty, PSDP B nandu’ kaadha’, ta’ maso’.
Tanto perak. Tape tandu’an dhari pamain PERSIP, ta’ maso’ keya. PSDP B tello
kale nandu’ maso’ terros, PERSIP coma sakaleyan se maso’. Kalaban paneka PSDP B
Juara settong. PERSIP Palalangan juara dhuwa’ (runner Up). Juara tello’ ban
empa’ ekoca’ juara kembar, asabab ta’ usa amaen. Badha kabar ja’ bakal badha
Liga Cekeran pole se bakal esaba’ e lapangan adha’na Balai Disa Karduluk,
lapangan se mereng ka lao’.