Lalampan.com. 1444. Kaodhi’an sastra Madura lakar
lep-taselep. Namong badhana media akadiya Radar Madura sareng Majalla Jokotole
ampon mabinar atena masyarakat Madura. kalaban badhana dhuwa’ media paneka,
sastra Madura pendhanan jurbu dhalem sapolo taon paneka, lema taon pertama ta’
bannya’ buku sastra Madura ngombar, namong lema taon toleyanna, sastra Madura
ampon ngaolle tandha Pangesto dhari Yayasan Kebudayaan Rancagé e taon 2020,
2021 tor 2022. Ka’dhinto aropa’agi tandha ja’ sastra Madura ampon odhar tor
jurbu.
Maos jugan
- Mudhar CH: Pengaro dhari Arach Jamali
- Kembang Asoka, Moh Ghalib Bafadlal
- Proses Perpanjangan SIM di Sumenep
- Bakto Aba’ e Jakarta
- Paparegan Madura
Taon mangken (2022) badha dhuwa’ buku ngombar se
kapeng settong enggi paneka bukuna Ajaz Elmarzy kalaban bul-ombul “Odhi’ ban
Ta-caretana”, buku paneka ngombar dhari penerbit Sulur Pustaka Yogyakarta. Ajaz
paneka menangka lanceng dhari Tambaksari, Kacamadan Rubaru Songennep, se
ka’dhimma ampon dujan ka buku molae gi’ buru asakola, lebur noles jugan ampon
daddi gu’-ganggu’ sabban arena molae gi’ mondhuk. Lanceng paneka andhi’ idola
aropa Sapardi Djoko Damono tor jugan Fiera Besari.
Dhalem buku “Odhi’ ban Ta-caretana” aropa’agi
satengkes sanja’. Se ka’dhimma sanja’ paneka aropa’agi babulangan dhalem
ngaronge kaodhi’an. Lanceng caccel paneka penter molong basa dhari pasera bai
se adungngeng dhari sadaja bab kaodhi’an, se rengsa, se bunga, se nyapcap aeng
matana tor jugan ngalecerra jail se ta’ sempat etadhai. Buku paneka ngaolle
tandha pangesto dhari masyarakat Songennep, se ka’dhimma cokop bannya’ oreng se
messen buku paneka. salaen ka’dhinto, Ajaz jugan andhi’ kanca dhari Songennep
kantos Malang, saenggana ca-kancana terro maca’a sadaja.
Tolesanna ampon langkong badha’an se ngombar e
pan-saponapan media, sae media koran otaba media online. Badha jugan se ampon
terbi’ abujut buku antologi areng-bareng, kadiya Kaki Api (2018), Kisah Kasih,
Bagian II (2020), E & Joy (2021), Kasih Menata Luka (2021), Senja dan
Pelabuhan Kecil, Jilid I (2021), Bersyukur dalam Rasa (2022). Tor paneka jugan,
Ajaz Molae gi’ asakola sampe’ akulliya, pajat bur-leburanna apol-kompol ban
komunitas otaba organisasi. Dhimen aropa’agi kader PMII Pamekasan, UKM PI &
Riset, Katowa HMPS TBIN, Pimpinan Redaksi Majalah BINAR, anggota PRAHARA,
Bengkel Sastra, IMABSII, tor en-laenna. Dineng samangken, aropa’aghi pegiat
Komunitas Ghai’ Bintang, Komunitas Langgar Qur’an Sumenep.
Se kapeng dhuwa’ enggi paneka buku ‘Damar Kambang’
serradan epon AH Hasmidi. Oreng Moncek Tengah Lenteng paneka ampon seggut
dhalem noles basa madura, carpan epon noro’ maso’ dhalem buku Satengkes Carpan
Madura “TORA” se ngombar dhari Radar Madura e taon 2017. Dhalem buku “TORA”
paneka badha salekor pangarang tor sabidak tello’ carpan se akompol. Badha
dhubellas carpan karangan Hasmidi dhalem buku TORA. Menangka pangarang paleng
dujan noles carpan dhalem buku paneka.
Dhalem buku Damar Kambang se ngombar dhari penerbit
Sulur Pustaka (2022) jugan aropa’agi satengkes careta pandha’ (carpan).
Caretana Masyarakat Madura, wabil khusus Songennep daddi palappa dhalem
kompolan carpan se agambar damar kambang paneka. AH Hasmidi neka akadiya
seraddanna, carpan “Kamar Petteng” dhalem Damar Kambang jugan agambarragi
kadinapa kaodhi’an masyarakat Madura se coma abandha damar mellok, kene’ namong
bisa nyonar tor nera’e. badha kaodhi’an se coma ngambang, ta’ etemmo pasthena.
Lanceng se perna mondhuk e Al-Islah Moncek Tengah paneka caccel dhalem mapolong
gel-togellan careta, saenggana epapolong dhari pan-sanapan careta tor esambung,
daddi careta tonggal se agubek kajembaran.
Maos jugan
- Lukman: Ngaronge Sagara Madura
- Jamal D Rahman Maos Carpan: Agi’-gigi’ SangngarraJagung
- "Ja' Nyorot" Pak Mahfud!!!
- Sanja’na KHALIL SATTA ÈLMAN
- Mendalami Ketubuhan dan Kebutuhannya
AH Hasmidi salaen asakola e STKIP PGRI Sumenep jugan
akompol sareng LKSB (Lembaga Kajian Seni Budaya) Pangesto Net_Think Community
Sumenep e parkompolan paneka AH Hasmidi ajar noles. Samangken AH Hasmidi
menangka guru SMAN 1 Bluto tor jugan MA Al-Ishlah. Salaen paneka, jugan akompol
dhalem Komunitas Kampoeng Jerami. Serradanna jugan maso’ dhalem buku Tidar
Media, Forum Aktif Menulis, Penerbit Genum dan Cinta Yang Terus Mengalir (Soul
Media, 2017). Hal paneka adhasar dhari buku TORA.