Lalampan.com.
1444. Empa’ buku sastra Madura eterjema’agi ka dhalem basa Indonesia. E taon
dhuwibu salekor (2021), badha empa’ buku sastra Madura, buku se etoles kalaban
basa Madura eterjema’agi ka Basa Indonesia, salaen buku Basa Madura, jugan
badha basa Jaba tor basa Using
(Banyuwangi). Buku kasebbut bisa eterjema’agi sareng Balai Bahasa Jaba Temor.
Pelaksanaan penerjemahan dhalem tello bulan.
Buku
kasebbut aropa’agi satengkes careta pandha’ se abul-ombul “Lanceng Talpos”
karangan epon N Shalihin Damiri, se pajat ngombar e bulan Mei taon 2020 dhari
penerbit Diva Press Yogyakarta. Buku paneka aesse sapolo careta pandha’, pan-sanapan
careta pandha’ paneka ampon ngombar e Jawa Pos Radar Madura. Buku paneka ekerem
ka Yayasan Kebudayaan Rancagé e taon 2020.
Maos jugan
- Jajan Genna'
- Teks MC Bahasa Madura
- Baliker Pote
- Agantong Kakapper Sabellun Pajjar
- Contoh Undangan Bahasa Madura
Buku
se kapeng dhuwa’ enggi paneka jugan satengkes careta pandha’ se abul-ombul
Satengkes Carepa Pandha’ Madura “TORA”, buku paneka aropa’agi karangan salekor
pangarang dhari (sa) Madura. Badha sabidak tello’ careta pandha’ (carpan)
dhalem buku paneka. salekor pangarang paneka aropa’agi oreng se seggut ngerem
tolesan carpan dhari 26 Juli 2015 kantos aher 2016. Buku paneka ngombar e taon
2017, eterbittagi sareng Jawa Pos Radar Madura. Sadaja careta pandha’ se badha
dhalem buku paneka eterjema’agi ka dhalem basa Indonesia.
Buku
se kapeng tello’ enggi paneka buku sanja’ (puisi basa Madura) se
abul-ombul “SOKANA” karangan Mat Toyu,
buku paneka ngombar e taon 2020 dhari penerbit Koma Media (kerja sama sareng
arsipprosamadura, se eseppowe sareng saleran se molja, Pangeran Fajri Andika)
Yogyakarta. Buku paneka aesse pettong polo sanja’ Mat Toyu malolo. Pan-sanapan
sanja’ jugan ampon perna ngombar e Jawa Pos Radar Madura, akadiya gula,
karopo’, tor jajan genna’. Buku paneka jugan ekerem Yayasan Kebudayaan Rancagé
e taon 2020.
Buku
se kapeng empa’ enggi paneka buku satengkes careta pandha’ karangan Lukman
Hakim Ag se abul-ombul “Oreng-oreng Palang.” Buku paneka ngombar e bulan
Desember 2018 dhari penerbit Sulur Pustaka Yogyakarta. Aesse ennem careta
pandha’ peleyan. Sanajjan carpan, caretana e dhalem buku paneka cokop kowat tor
bannya’ agandhu’ parsemon engga baburugan se patot daddi tatengnger dhalem
ngadhebbi kaodhi’an.
Empa’
buku paneka aropa’agi peleyan dhari Balai Bahasa Jawa Timur. Dhalem pelaksanaan
penerjemahan paneka, tim se nerjema’agi epele kalaban seleksi. Seleksi paneka
pajat apabadha sareng Balai Basa Jaba Temor. Bakto ganeka, bannya’ se noro’
seleksi, badha sekitaran saekeddan lebbi. Dhalem seleksi paneka, pangarang
jugan tamaso’ dhari bagiyan juri. Molae dhari Lukman Hakim Ag, N Shalihin
Damiri tor Mat Toyu.
Maos jugan
- Pantun Dhalem Kaodhi'an Manossa
- Nyandha' Caretana Sattar
- Kota Tua dan UK
- Tasdid dhalem Basa Madura
- Kamus Bahasa Madura
Salastarena
seleksi badha tello’ se lolos kaangguy daddi penerjema. Settong penerjema
khusus buku TORA aropa’agi dhari Balai Bahasa dibi’, enggi paneka Dwi Laily
Sukmawati (Pimpinan Redaktur Majalla Jokotole). Bapak Adrian Pawitra oreng Madura se nettep e Sidoarjo. Bapak Adrian pangaran kamus besar
Bahasa Madura Indonesia aropa’agi se nerjema’agi buku sanja’ “SOKANA” karangan
Mat Toyu, Bapak Dr Moh. Hafid Efendy. M.Pd. dhari kottha
Pamekasan, (Ketua Yayasan Pakem Maddu tor dosen IAIN Madura) aropa’agi se
nerjema’agi buku carpan “Oreng-oreng Palang” karangan Lukman Hakim Ag, tor se
nerjema’agi buku carpan “Lanceng Talpos” karangan N Shalihin Damiri enggi
paneka Nurul Fadhilah se dhari Ambunten Sumenep.
Saamponna
eterjema’agi ka dhalem basa Indonesia, ta’ laju eterbittagi, namong gi’
etalektegi sareng pangarang-pangarang Madura akadiya Mahwi Air Tawar tor Royyan
Julian, jugan dhari kalangan akademisi enggi paneka Profesor A Ghazali Syukur,
se kalongguwan epon dhari Malang. Saamponna antara pangarang (N Shalihin
Damiri, Mat Toyu tor Lukman Hakim Ag) saroju’ monggu hasil terjema’an epon, tor
jugan sobung se parlo epasae pole, buku paneka bisa eterbittagi.
Aneka Hasella:
