carpan: Mekar

carpan, sastra madura, ach jazuli, bahasa madura, sumenep, sampang, pamekasan, bangkalan, situbondo, jawa timur indonesia


"Ba'na arapa, Tar. Ma' laju cengngeng malolo dhari gi' buru."

"Tar... Sattar..."

"Ba, paya... Cengngeng sakale. Arapa ko?"

"A... Adha' ta' arapa..." Sattar laju takerjat polana mare egettak mon Sahrum. Eyabasagi molae gi' buru gun cengngeng. Nga'-manga'. Enga' anggu' ta' epece'.

"Ba'na arapa, koddi acareta mon badha masala."

"Enja', Rum. Engko' ta' apa-rapa. Engko' gun mekker...."

"Mekker apa?" Sahrum dhapa' nyandhak ka bantana Sattar ma'le duli eterrosagi.

"Ba'na tao kan, ka Mekar se engko' caretae ri'-bari'na. Babine' se engko' kagumi pola tengkana. Babine' se aghabay taresna enga' sateya."

"Ya, tao. Arapa keng...." Sahrum macampo alessa. Maserius ngedhingagi.

"Mekar rowa sateya la lulus S2-na. Malemma akabar ka engko' ja' bulan empa' awisuda'a."

"Ya bagus mon enga' jyia, Tar. Apa ma' dala ngalamon ba'na"

"Dhante' gallu, jha' ba'na laju pas megga'-megga' ka tang banta. Ja' reng gi' ta' mare." Sattar maggis ta' latenna ka Sahrum polana cot-nyaroccot pabantana.

"Enga' reya, Rum. Ya lakar settong rassa poji sokkor se raja, Alhamdulillah se ta' abates, Mekar sateya la lulus S2-na. Tape salaen jareya engko' pas sajan aromasa ta' pantes bang-nabangnga Mekar. Sabbhan are lako ngaolle prestasi. Orenga penter. Cerdas. Gi' jekjek ibadana. Mekkere aba', pera' gun-paggun enga' reya. Neser keya ka Mekar mon laju ngaolle oreng lake' enga' engko' se tadha' pa-apana. Ta' andhi' pa-apa."

Maos jugan

Bakto jareya re-mare Asar, Sattar ban Sahrum jat lakar biasa toju' wa'-dhuwa'an e gardhu lao'na kosanna. bi-kobiyan mon teppa'na badha. Kateppa'an bakto jareya teppa'na badha. Karena malemma se epa'anga' pole.

"Ba'na ta' usa mekker enga' jia, Tar. Banne ba'na ri'-bari'na perna abala ka engko' ja' Mekar lebur keya ka ba'na. Andhi' rassa taresna keya ka ba'na. Ta' usa mekker se ne-banne. Ban pole sanajjan engko' ta' kennal akrap ban Mekar, tape mon menorot engko', Mekar rowa reng bine' bagus. Ta' kera andhi' pekkeran enga' se ekangen-bangen ba'na. Rassana Mekar ta' kera ajelling arta ban pangkatta ba'na."

Sattar gun nondhu', akekep ta' nemmo saot. Pekkeranna terros bang-ngabang. Nyaleyot man-dha'eman. Sambi abanta, atena ce' leburra ka Mekar terro nga'andhi'a. Sakeng neser ka Mekar naleka gun ngaolle lalake' enga' aba'na. Repot. Mon kodu aleppas Mekar, aba'na rassana ta' kera kowat. Cora' Mekar la ekabantalla pate. Ka reng towana la mare ecareta'agi.

"Mon lakar Mekar mandeng kabadha'anna kaodhi'anna ba'na. Yaktena Mekar ta' kera narema ba'na molae lamba' naleka ba'na pertama kali ngoca' andhi' rassa lebur ka Mekar. Tape buktena Mekar lebur keya kan ka ba'na. Narema ba'na sampe' sateya. Ban Mekar pajat la tao ja' odhi'na ba'na enga' apa."

Sattar paggun nengneng. Paggun nondhu'. Tekka sakeccap ta' abanta. Kobina gun lowang ka Sahrum. Sattar gun aroko' tape rangrang panyergu'na. Okossa na'-karana'a se ngebbulla. Ta' emo-temmo matana nyarembeng. Egusot tako' ekoca' manyeng. Tape Sahrum la ngarte ja' kancana teppa'na bingong onggu. Ta' kera eco-koco enga' teppa'na aja'-gaja'an. Sattar mon kadung lebur ka settong oreng bine' lakar jat onggu-onggu. Ban Mekar lakar jat reng bine' se ekaleburin la abit.

"Engko' kodu baramma, ya Rum?"

"Ya' ta' ma-baramma, Tar. Laju toro'e oca'na atena ba'na. Ya ja’ loppa abala pajujur kabadha'anna ba'na ka Mekar. Sakeng bantana ate kodu toro'e sambi pekker. Sopaja' ta' petteng. Sopaja andhi' ra'ara."

"Mon ate eman sara ka Mekar, Rum. Tape rassana cora' enga' se ngala' kareppa dibi' naleka gun maksa'agi kabunga'anna aba'. Ta' ngabas kabunga'anna Mekar. Engko' gun tako' Mekar ta' bisa jembar naleka apolong ban engko'. Nengneng ban engko'. Marga tang kaodhi'n gun enga' reya badhana. So'-lorso'an ka bara' ka temor lakona. Jau sara katembang kaodhi'na Mekar. Presentasina la bannya'. Balana la samporna. Sakola'anna gi-tenggi kabbi."

Matana Sattar nyarembeng pole. Se kacer nyapcap ka pepena. Dhuli eguset ka sarongnga. Sahrum noro' tapegga keya. Kancana rekong aba'na noro' ta' mangga keya. Ba' apa kerana se kodu ekalako ka'angguy bisa abanto. Neser rassana kabasagi taresnana Sattar se ce' dhalemma ka Mekar.

Are la nganthang mera, masjid ban langgar ka nganthang amonye. Badha se ngaji ngodhi'i kaset. Badha se asholawaddan. Badha se asyi'iran. Ker-dhikkeran. Tandha bakto Magrib la para' ngombarra. Ontong sabellunna toju' ka gardhu Sattar ban Sahrum la mare abajang Asar. Daddi ta' pate su-kasusu. Sahrum ngajak Sattar abali ka kosanna. Ngajak mandhi polana la para' competta are. Dhaggi' ma'le kacapo' se abajangnga berjama'a ka Masjid.

Sattar laju pas ajalan nondhu'. Ta' abanta sakale. Pangabasanna berse. Pera' gun katonna ajalan kadhuwa'an. Tape nyatana Sahrum enga' se kadibi'an. Ngabasagi Sattar gan cekka' manjeng ban dhapa' ka kosanna la pojur. Polana badanna la geddur. Banne korang dhara. Sakeng korang gellu'anna sokma.

Dhapa' ka kosanna, Sahrum gancangan mandhi. Ase-berse. Sattar toju' pole e korse kaju eadha'na kosanna.

"Ba, dhi-mandhi. Owa' la adan. Mayu ka Masjid." Oca'na Sahrum sambi masang kancengnga kalambina.

"Ya, mayu, Rum. Engko' gun ngala'a wudu'. Pas mangkat mayu."

Dhapa' ka amperra masjid, Sahrum ban Sattar gasek abajang sonnat tahyatal masjid. Marena pas aduwa. Ker-dhikkeran sambi tos-ngantos ikomah. Ta' loppa aneyat i'tikaf. Nyopre kaberkadan dhalem odhi'na.

***

Maos jugan

"Tar, HP-na buru amonye. Pola badha telpon." Oca'na Sahrum se teppa'na maca buku.

Sattar teppa'na jareya gi' buru dhari lowar. Dhari kantor jasa kirim. Naragi paketan. Paketanna bukuna. Pessenan bukuna. Ya, bukuna Alhamdulillah badha'an se messen. Sae ca-kancana e Madura, e jaba, ban badha keya se messen dhari manca nagara.

"Pola gun WA." Oca'na Sattar sambi ngala' Hp-na.

Sajjaggha ebukka', lema' panggilan ta' terjawab dhari Mekar. Essenna dhadhana jendharan pole. Ta' sanggup cora'na naleka kodu abanta ban Mekar e malem jareya. Sattar noles pesan. Ehapus. Noles pole. Ehapus pole. Noles pole. Sambil elang-ulang pole. Eli-bali pole. Atena abanta ta' re-mare.

"Le', engko' saporana, ya. Ta' bisa mabunga ba'na. Gi' ta' bisa daddi se samporna ka ba'na." Terros akarettek ali-bali. Ta' re-mare. Nyarembeng pole. Nyapcap pole.

"Astagfirullah... Astagfirullah...." Bibirra akebbi'. Nyabana akelbu'. Matana ngeddem. Terros abanta ban aba'na dibi'.

Lampu kamarra epate'e. Sattar nyaba' badanna ka kasorra. Agentang. Natthang. Ta' abantal. Nyabana ongga toron. Aeng matana ta' kenneng tamba'. Egusot nyarembeng pole. Egusot nyapcap pole. HP-na amonye ta' eestoagi. Gun eabas. Ejellingagi. Ate ban pekkeran gun abanta.

"Le', engko' eman sara ka ba'na. Sakeng tako' ta' bisa mabunga ba'na." Terros abanta. Ta' bu-ambu. Lir-giliran.

Naleka sa'abidda agentang. Mowana asonar kalaban lampuna HP-na. WA-na ebukka'. Ebaca. Maca pesan se dhari Mekar.

"Mas, arapa ma' ta’ eyangka', Mas."

"Mas, arapa ma' ta' ebales tang pesan."

"Mas, ba'na arapa?"

"Mas, ta' biasana enga' reya."

"Arapa ba'na, Mas?"

Pesanna laju nyaroccot. Airi. Pesan dhari Mekar. Sattar bingong ja' ebalessa apa. Ja' abanta'a apa.

"Engko' eman onggu ka ba'na, Mekar. Sakeng tako' ba'na gun rengsa malarat odhi' ban engko'." E atena gun badha cap-keccap jareya. Tadha' pole.

 

Tambaksari, 10/01/23

*Ajaz Elmazry aropa’agi nyama khusus dhari Ach Jazuli. Lanceng paneka babbar e Disa Tambaksari, Rubaru, Songennep. Nganthang asakola dhri SDN Tambaksari tello’ tor lastare tawon 2010, nerrossagi mondhuk sambi asakola Tsanawiyah (2013) tor jugan Aliyah (2016) e Darul Ulum Prongpong. Lanceng se pelka’ elmo paneka nyare sakola’an se lebbi tenggi, mela dhari paneka, aba’na acangrep ka Program Study Tadris Bahasa Indonesia, Fakultas Tarbiyah, IAIN Madura, tanto kodu maso’ dhari S1-na, lastare tawon 2020. Aromasa ta’ cokop tor gi’ aromasa kakorangan elmo. Aneka lakar lanceng se korang ajar. Korang malolo. Saenggana dha’ ka’dhimma bai etabang. Akadiya ka se kodu mangkat ka Malang, ajar e Magister Pendidikan Bahasa Indonesia, UNISMA Malang, Jaba Temor. Tanto ta’ ga-oga.  Samangken gi’ ngalakone tugas aherra se anyama Thesis.

Tags

Posting Komentar

Lebih baru Lebih lama

Formulir Kontak