Rora Basa Madura

 

Rora Basa Madura

Lalampan.com. 1444. Sala settong sastera Madura se pon kona, ta’ epanggi dhari taon sanapa paneka amola otaba ekabidi enggi paneka, Rora Basa, roar basa paneka ampon daddi ca’-oca’ dhalem kaodhi’an re-saare, ren-aren masyarakat Madura (Madura, tapal kuda kantos Bawean), oca’ paneka jugan gampang, salaen gampang ekaenga’e, jugan gampang agabay, ta’ parlo mekker lanjang lebar, mekker dhalem otaba mekker loar, napa pole sampe’ mekker sabara’ ra’ra’. Aneka pera’ ontong ban nyamanna basa Madura. gampang. napa teppa se paleng semma’ ka ba’-aba’an, enggi paneka ajai’ kalambi. Aneka pon Rora Basa. Sampeyan napa anyamae ca’-oca’ kadi paneka.

Akadiya jugan ngoca’, moger geddhang, saestona banne moger geddhang, edhimma badha geddhang ambu poger, se badha moger bungkana geddhang. Badha oreng atanya. Entara dha’emma? Entara moger (bung)kana geddhang, enggi badha jugan se gun ekala’ konco’na; tara moger kan geddhang (sela bariya ngoca’ bungkana, se pas daddi kana, esenta’ dhalem pangocaban, kan geddhang, kan maronggi, saestona bungkana maronggi, namong asabab dialek daddi esentak sakone’, kan geddhang).

Maos jugan

• Taxi Driver 2: Ajalan Nojju Kaadilan
• Maongga Bako Madura
• Tak Dapat Kedudukan: Menuju AICIS 2023 Surabaya
• Elangnga Pangajiyan

Hal paneka ekoca’ Rora Basa, enggi paneka kalero otaba korang samporna basana, namong ta’ arosak ka maksod epon.  Ajai’ kalambi, moger geddhang, agaluy kopi. Ngambat aeng. Ajai’ kalambi, paneka lerres, namong badha se korang, se samporna enggi paneka, ajai’ kaen sopaja daddi kalambi. Jugan ajai’ lobang se badha e kalambi. Moger geddhang, enggi se samporna, moger bungkana geddhang, agaluy kopi, enggi se samporna, agaluy aeng se ampon acampor kalaban kopi tor gula, tantona aengnga panas (mare egaluy ja’ laju sordhuk, me’ kolbas jilana).

Napa pole oreng Madura neka pajat semma’ ka tane, saenggana tanto bannya’ babasan se jugan semma’ ka tanena, akadia, arao panja’, se sanyatana lakar arao, abersean rebba se tombu abareng panja’, rebba se ngampong tombu polana badha buthok, enggi nyaman rebbana, nyenna, padhina berging. Mekol Aeng, napa sala ngoca’ mekol aeng, bunten ta’ sala, tor napa kodu oba ka oca’, mekol genthong, mekol embir, enten. Sanajjan mekol aeng neka pajat lakar badha baddhana. Enggi lerres lakar mekol aeng, namong dhalem mekol aeng ganeka pagguna badha badhana, akadiya genthong, embir, tor laen epon.

Paneka teppa monggu Rora Basa, akadiya agiling tahu, se saestona lakar agiling (agilis) kadhelli sopaja bisa ekagabay tahu, ajaga mano’, mano’ ejaga? Ma’ lar-kellar gellu’, arapa mon alako laen, se ekamaksod kan ajaga saba, sopaja mano’ kan ngakan, ta’ nyolpe’ padhina, mangkana pas ekoca’ ajaga mano’, napa pole pas mekol jindhul. Enggi kalako jindhul pekol, se gun sabai’. Oreng ngoca’ mekol jindhul, polana pon ebaddhai embir, ebbak, otaba kelmo’ ban laen samacemma. merres pathe. Se la pathe gi’ eperres, ekala’a napa pole. merres pathe maskodda, nyeor se pon mare eparot, eperres ekala’ pathena, (ngangguy h gi, mon ta’ ngangguy h, ekala’ patena, eantos matena wa).

Maos jugan

• Okara Kakanten Basa Madura
• Parebasan Madura ban Contona
• Eja'an Dhalem Basa Madura
• Tasdid dhalem Basa Madura
• Oca’ Bakal dhalem Basa Madura

Tor bannya’ ca’-oca’ rora basa se laen, se bisa sampeyan agabay dibi’. Akadiya mesel roko’, nae’ nyeor, nae’ la’ang, adabu’ oto’, nana’ nase’, noto teppong, noto bobo’an, ngale somor, ngobbar kampowan, ngandel aeng, ngondhu buwa, ngakan seyang (seyang bisa ekakan? Ngakan nase’ bai rapa kana’. Baja apa se kennyanga mon gun ngakan seyang, mon ngakan nase’ pola bisa nompo’ lemma’ karbo. Ta’ iyya???)