Sajjegga ana'na epakabin. Mottolib gun odhi'
kadhuwa'an moso binena. Ana'na se talebat raddin ca'na bala tangga la paju
lake.
Badha na'-kana' ngodha dhari Jaba se dhateng alamar
ban ta' ngantos abit lasu menta akabin. Gun ngonjang satatangga'an ban
taretanna se semma'.
Karaddinanna ana'na Mottolib lakar daddi careta. Tape
tadha' reng lake' se bangal alamar se semma' dhari romana. Molae gi' kene',
potrena Mottolib lakar penter ban langganan juara kellas e bakto
asakola. Ca'na oreng-oreng. Raddin ban manes mon eabas.
Liana, nyama potrena Mottolib buru sataon kalowar
dhari kampus e Madura. Reng bine' jareya lakar esak. Bannya' lalake' tako'
kaangguy alamar. Tadha' se bangal kaangguy menta maske reng bine' jareya ta'
lebur acar-pacaran molae lamba'.
Saongguna badha reng lake' se dhateng kaangguy menta.
Dhari kalowarga ponggaba keya. Tape ta' etarema. Liana ta' endha'.
Kantos dhateng reng lake' laen ka romana. Arapa ma' reng
lake' jareya etarema? Rengkas careta, ca'na se kadhuwa la padha kennal
sabellunna. Tape ta' kantos car-pacaran.
Maos jugan
- Orasi Lathif di Tengah Ngobrol Pemikiran
- Konye’ Gunong Monggu Kerrong ka Omba’
- Rèng Binè’ Ḍâlem Kepkeppan Jhâman
- Carpan: Andharun
- Pangarep Taresna
"Kaula jugan laher e Madura, Pa'. Namong ampon
gadhuwan Roma e Jaba." oca'na mantona ebakto gi' buru alamar.
Mottolib mele reng lake' kalaban dhuwa' arebban.
Settong padha neser se kadhuwa. Dhuwa', andhi' teggu'an kalakowan.
Mantona daddiya ponggaba e settong kampus e Jaba. Buru
tello taon se angkat daddi Ponggabana Pamarenta e kennenganna alako.
"Ba'na ma' bisa kennal ka ana' sengko'?"
ngoca' Mottolib.
"Enggi, ampon judhu pasthe paleng, pa'."
jawabba mantona.
"Enja', engko' gun terro atanya'a." sawodda
pole.
" Enggi, dhimen e bakto badha acara Kampus.
Abdina ta' sangaja, tapanggi sareng potre Ajunan." ca'na mantona arassa
todhus.
"Iya. Ta' arapa. Paleng la judhuna ba'na ban tang
ana'," sawodda.
"Serrena ba'na la mare akabin, engko' neteba tang
ana', rabattagi pateppa' ya. Paenga' mon sala ban ja' atokaran." ca'na
Mottolib.
"Oreng akalowarga lakar badha ojiyan ban cobana.
Samoga ba'na ban ale’na kellar ngadhebbi." ca'na Mottolib.
"Enggi, nyo'ona du'ana, abdina ban ale' bisa
padha ajaga rassa esto saterossa." sawodda.
Oreng-oreng sela tao ja' ana'-na Mottolib la paju
lake. Padha terro taowa kabbi ka robana. Asabab, Mon ngabassagi robana ana'na
Mottalib rassana oreng langsung terro. Raddin parana. Raddin ban bagus tengka
gulina.
E bakto badha salamedanna nyaebuna tatanggana
Mottalib. Bannya' oreng bine' akompol
kaangguy long-nolonge e dhalem salameddan jareya. Oreng-oreng bannya' se padha
adha-kandha kabinanna ana'na Mottalib. Tantona e kadha-kandha ebakto tadha'
binena Mottolib.
"Padhana sapa orengnga?" Ca'na se laen.
"Enja' e dhimma se kennal?" Ngoca' laenna.
" Ma' bisa etarema mon ta' bisa ekapolong
keya," nyaot laenna.
"Dhu, ca'na oreng jau." Sawodda laenna.
"Ongguwan, Patot keya salerana." ngocol
laenna.
Kantos dhuware lebbi, oreng e Disa gun abanta
kalowargana Mottolib.
"Engko' ngedhing kabar sabellunna, ja' ana'-na
Mottolib epenta settong Ponggaba. Gun ta' etarema." nyaot pole.
"Bah, engko' ngedhing keya ja' badha settong
potrana keyae e Disa. Tape potrena Mottolib ta' endha' keya," ca'na
laenna.
"Dhu, pamele onggu ana'na Mottalib rowa,
ya." Nyaot laenna.
"Ja' senga' ano kan nyaman. Ca'na se alamar kabbi
oreng semma'. Keng bida Disa." ca'na laenna.
Maos jugan
- Lanceng Talpos Ban Salbut
- Sajak Orang Pesisir
- Penyakit Psikis Remaja
- BARBARIKA
- Jamal D Rahman Maos Carpan
****
Sajjegga ana'na noro' lakena ka tana Jaba. Lebbi
sataon, Mottolib gun odhi' kadhuwa'an moso binena sambi' ngantos ana' bine'na
duli kapareng katoronan. Saenggana bila amaen kaangguy nyapot aba'na. Bisa
dhateng kalaban kompoyya.
"Dhu, bungana bila tang ana' daggi' la andhi'
katoronan ban dhateng kabbi dha' enja." sawodda dhalem ate.
"Lib, Lib !" Binena ngolo' dhari Lowar.
"Badha apa, Bu'? Sawodda.
"Lib, Lib !" Binena ngolo' dhari lowar
labang romana.
"Badha apa, Bu'?"
Tadha' sowara pole se ngolok dhari lowar roma.
Mottolib duli kalowar. Takerjat !
"Allah, Allah !" Serrona binena.
Liana nelpon dha' reng towana. Ja' lakena tabra'an
ebakto nyettir mobil e Jalan Tol. Nyabana ta' bisa etolong.
" Allah, Allah!" Serrona kabbi sambi kalowar
aeng mata.
Fendi Chovi, babar e Songennep. Lebur nganggit careta. Pan-saponapan ongkas serradanna terbi’ daddi buku, ngombar e media cetak tor media online. Eyatore akanca lebat sosial media Instagram @fendi.chovi