Mat Tajir arassa odhi'na ta' padha ban arte nyamana.
Banne tajir otaba kasogiyan se ekaolle aba'na tape talpos tadha' sakale.
Apapole, aba'na buru kala amaen tarowan.
Tana sangkolan reng towana la ngalto' kabbi ecapo'
kalakowanna dibi'. Sateya Mat Tajir gun
odhi' lako aserro. Kasta ban nespa. Pessena kaangguy melle roko’, bensin
sapedha ban kabutowan laenna la tadha' sakale. Aba'na kodu aotang gallu ka
tatanggana se ajaga barung mon terro aroko'a.
Atamba are, kaodhi'anna Mat Tajir gun akaton ma abi'
essena pananggalan. Atamba towa tape tadha' ollena apa-apa se daddi kabunga'an
dha' aba'na e budhi are. Odhi'na gun kare sakerra' dhaging se cekka' eaba'na.
Mat Tajir apangrasa ja' molae gi' ngodha kantos towa
gi' ta' bannya' se aoba e dhalem kabadha'an odhi'na. Oreng laen la padha kellar
majaga bengko, Pangkeng, kantos melle teggal ban laen-laenna se daddi careta
ro'omma ka oreng laen.
Mat Tajir gi' paggun daddi oreng mesken. Odhi'na
ekarassa gi' ta' bajra. Saongguna banne ta' bajra. Tape pola tengkana ta' bendher.
Dunnyana bannya' se ngalto' ta' karowan.
Ollena alako dhari hasel lalakon se ta' bagus. Gun
tadha' e jalan. Ta' akare sakale. Mon ta' tadha' ekagabay neng-sennengan.
Tadha' cekka'na daddi roma ban salaenna.
Maos jugan
Mat Tajir apangrasa gi' ta' kellar agutose bengkona.
Romana bai ollena hasel dhari sangkolanna reng towana sela tadha' omor.
" Aba' la ausaha keya. Keng aba' gi' ta' bajra.
Gi' kala pojur ka oreng laen," serrona ka aba'na dibi' e bakto
neng-ngenneng e adha'na romana.
Kaodhi'an oreng-oreng e Disa lakar ta' nanto.
Apa pole se kabadha'an odhi'na gi' ta' eangka' daddi
ponggaba Pamarenta ban ta' narema sangkolan dunnya se bannya' dhari reng
towana. Oreng jareya bakal ngadhebbi masala pangoreban se daddi panyake'
kasossa'an e dhalem odhi'na aba'na.
"Sela sangkolan dunnya ta' bannya'. Aba' gi' lako kala tarowan. Ya, talpos onggu ta'
akare," sawodda Mat Tajir sambi' agella' kadibi'an.
Sajjegga apesa ban binena. Mat Tajir gun ngala'
karebba dibi' ajalan sanyamanna ta' tao bakto. Asabab tadha' tanggungan pole
abalanjai odhi'na binena.
E bakto apesa ban binena, Mat Tajir gi' enga' kalaban
jellas. E bakto jareya binena mare nyendhu' nase’ ka angguy ngakan abareng ban
aba'na.
Mat Tajir bakto jareya kalowar sakejja' kaangguy melle
roko’. Asabab marena ngakan mon ta' aroko’. Aba'na akaton ta' tennang. E bakto
kalowar, Mat Tajir loppa nyambi Hapina se esaba' e attassa etto'.
Badha panggilan telpon amonye dhari Hapena. Nit Ninit
.. Nit Ninit Ninit .... !
"Pasera gi?" Binena atanya.
"Engko' burleburanna lakena ba'na," sawodda
sowara e dhalem.
Binena manjeng kalaban mowa mendher.
Marena jareya, nase’ se badha e pereng se gi' buru
mare e sendhu' ngabbar. Ngalto' ka lamari, kaca, korse ban laen-laenna.
"Badha apa? Ca'na Mat Tajir sadhapa'na.
"Baddiyanna ba'na, mas.
"Badha apa?"
"Baddiyanna ba'na, mas."
Se kadhuwa atokar. Saleng cakar, Saleng pokol. Saleng
ancan kalaban essena barang-barang se badha e Roma. Parabut e dhapor daddi
sal-sal kabbi. Marena jareya. Se kadhuwa apesa daddi lake bine.
Lamba' gi' ta' olle sabulan apesa. Mat Tajir badha
karep abineya pole. Tape odhi'na korang ontong. Asabab badha se alaporragi ja'
aba'na daddi pangellarra tarowan ban ajuwalan kartu. Saenggana aba'na epega’
moso Kulisi Pamarenta.
Bannya' oreng noro' bunga e bakto Mat Tajir epega’.
Tengkana eanggap mababbaja kaodhi'an na'-kana' dhad-ngodhadan e Disa. Mon
taonan e dina daddi rosagga dha' masarakat ban nagara budhi are.
Badha kabar ja' Mat Tajir lako daddi bagiyan dhari
kadaddiyan juba' e Disa. Padhana Kamalengan e romana oreng ban macema. Tape ta'
bannya' se tao.
Buru samalem epega’, ta' ngantos abit. Mat Tajir la
enneng ka lowar. Akaton tadha' sala e dhalem odhi'na.
Ca'na oreng-oreng Mat Tajir ta' eokom. Polana badha
oreng ta' ekennal senebbus. Mat Tajir arassa perak ban apangrasa odhi'na sakte
kalaban kalakowanna se juba' tape ta' kenneng okom moso nagara.
"Mat, Ba'na la kalowar, ya?" Badha se atanya
dhari lowar pagar romana.
Mat Tajir ta' nyaot. Oreng jareya gun ngabas ban
terros ajalan saellana aba'na ta' esawodi.
Mat Tajir gi' ta' tao apa se kodu elakone. Aba'na gi'
buru kalowar dhari kantor Kulisi. Pekkeranna gi' ta' karowan. Tadha' oreng se
mattennag sajegga apesa moso binena ban ana'na. Se kadhuwa padha mole
neng-ngenneng e bengkona dibi', romana karena mattowana.
Maos jugan
- Pantun Dhalem Kaodhi'an Manossa
- Kembang Asoka
- Narto lebur ka Reng Bine'
- Mamat Nompa'a Jaran
- Sajan Abit Oreng Atane
Baja sateya, Mat Tajir gun odhi' kadibi'an.
Dhang-sakadhang ana'na dhateng nyapot ka aba'na. Ana'na gi' seggut maenga' ka
eppa'na kaangguy ta' lako nerrosagi tengka juba'.
"Kaula adu'aagi, malar moga sampeyan ta' alakowa
pole amaen lalakon juba', pa'? Ca'na ana'na.
"Kalakowan juba' paggun abali ka aba'na dibi'na
sampeyan," sawodda pole.
"Kaula ngedhing dhari bala tangga ja' sampeyan kateban
masala. Asabab gi' ta' duli enga' ja' ka'dhinto kalakowan ta' sae." Oca'na
pole.
Mat Tajir ta' nyaot pas nyengla. Manjeng ngabassagi
kaju ban ka'-bungka'an laenna se badha eadha'na romana.
"Kaula nyo'ona sampeyan lekkas duli aoba. Ja'
toro'e napso, Pa'? Cakna ana'na.
"Saestona sampeyan bakal odhi' lebbi bajra,
daja, tor samporna manabi atoro' kalakowan se bagus," sawodda ana'na
sambi' noro' manjeng e budhiyanna.
Gun lako ecaramae ana'na, Mat Tajir noro' caremmet.
"Ba'na ma' omatao, Cong. Dina ja' ro'- noro'. Kassa' mole bai ka bengkona
embu'na," oca'na kalaban sowara bak tenggi.
Ngedhing jawaban padhana jareya, ana'na duliyan mole ta' kalaban amit. Ta' akare lampat bajang-bajangan.
*
Sabellunna Mat Tajir jaga marena agiggiri ana'na. Mat
Tajir gi' manyaman toju' e korse. Kantos badha dhuwa' oreng dhateng ka bengkona.
" Dar Dar Dar !!!! Sowarana pestol e kaedhing
dhari dhalem romana.
Monyena daddi sowarana se nako'e e bakto jareya.
" Dar Dar Dor !!!
" Dor !!!!!!!!!!!
Fendi Chovi, babbar e Songennep. Lebur nganggit careta e Media Cetak Jugan Media Online. Eatore akanca lebat sosial media Instagram @fendi.chovi