Selamat Datang di lalampan.com
Dhalem tello are paneka, kaula sareng para guru se
badha e SMP-N tor SMP-I eonjang Dinas Pendidikan Kabupaten Songennep kaangguy
alonggu e Kedai HK, molae are Salasa kantos are Kemmes (04-06 Reyaja 1445/11-13
Juni 2014). Hal ka’dhinto menangka “Optimalisasi PENGUATAN KAPASITAS GURU
BAHASA DAERAH DALAM PEMBELAJARAN KURIKULUM MERDEKA” se ka’dhimma dhalem
lalampan paneka marabu salerana se molja Bapak ajji Sunarjo, enggi ka'dhinto ngatoragi Paramasastra Basa Madura, akadiya konsonan alos, konsonan dhammang,
vokal berra’, engga carakan.
Jajarba’an se kapeng dhuwa’ e are Salasa enggi paneka
maemot Ondhagga Basa, molae dhari basa se paleng maba, basa tengnga’an, kantos
basa se paleng tenggi, aher-aher paneka bannya’ oreng se korang samporna dhalem
nyoson sorot nyander epon basa, akadiya; sengko’ adha’ar, enggi paneka kalero,
se lerres, kaula neddha, ajunan badhi adha’ar. Tor en-laen epon. Lalampa’an
ka’dhinto eatorragi kalaban parjuga sareng salerana se molja, Bapak Abd Aziz,
se rabu epon dhari Labbuwan se raja e Songennep.
Maos jugan
- Parebasan Madura, Sanja' Kona
- Tasdid dhalem Basa Madura
- Ma Ma’na Sanat
- Tase’ Tadha’ Omba’
- Resensi Buku; Kerrong ka Ombâ’
Are rebbu, sadaja guru eajak sopaja abadhi “Modul
Ajar” sareng salerana se molja Lora Harwiyanto, menangka guru SMA 2 Songennep.
Tanto bannya’ se pendha ropek kalaban badhana modul ajar paneka, namong bannya’
ru-guru se bisa abadhi Modul Ajar kalaban samporna. Seyang otaba ban-aban, para
guru se ampon lastare abadhi modul ajar, eso’on sopaja ajarbaba’agi e adha’.
Jau sabellun badhana lalampan ka’dhinto, badan kaula, ampon abadhi
rancangan kurikulum otaba rengrengan se badhi daddi pangajaran dhalem sataon
ajaran paneka 2024-2025. Serradan ka’dhinto ampon kaula serrat
sabellun badha onjangan dhari Dinas Pendidikan Songennep.
Bakto are pongkasan, enggi ka’dhinto are Kemmes, gi’
laggu paneka, para guru eajak alomampa dha’ jaman-jaman se ampon kona, enggi
ka’dhinto ajar sajara, Sejarah Sumenep, emolae Jaman Singosari, Majapahit
kantos Kraton Songennep, jugan ajarbaba’agi kabudhaja'an Songennep, akadiya
taneyan lanjang, pangantan, nyadar tor en-laen epon. Lalampan paneka eatoragi
sareng salerana se molja, Bapak Tajul Arifin.
Bakto seyang, se paleng pongkasan enggi ka’dhinto
etotop kalaban lalampan Pengembangan Literasi Bahasa Madura, se ka’dhimma mastowan
Lukman Hakim AG ajarbaba’agi pan-sanapan se kodu sekken dhalem abasa Madura,
molae dhari roma, keluarga, sakolaan, engga kantos pamarenta tor jugan badhana
apresiasi monggu para guru tor jugan moret se ampon gadhuwan serradan akadiya
carpan, sanja’ tor en-laen epon.
Mastowan Lukman Hakim AG jugan apareng pessen monggu
para guru se pon agalimpo’ dhalem Musyawarah Guru Mata Pelajaran (MGMP) Basa
Madura, sopaja ota enggala nero ru-guru se ampon bannya’ nyerrat, akadiya MGMP
Bahasa Indonesia, se ampon gaduwan buku, sanajjan bunga rampai, enggi ka’dhinto
tolesan dhalem settong buku se aesse banne namong dhari settong oreng, namong
jugan aessa sabarundhut macemma tolesan, akadiya carpan, sanja’, essay, resep,
kuliner, jar-kalanjar tor en-laen epon. Se penting guru paneka noles.
Samoga lalampan se elampa’agi tello are e HK, bakal abakta kasaeyan monggu Pendidikan e Songennep.