"Bula rassana ta' narema kalamon Dika. Bangal atengka ban saromban ka ana' Bula," oca'na Meskut ka Bunadi.
"Sabellunna Dika arassa esake'e. Lebbi bagus Dika
atanya. Ponapa ma' potra sampeyan epanga' ganeko," Meskut nyaot, ta' arassa tako'.
"Dika bi-talebbi nganiaja ka na'-kana' se koduna
cokop kalaban epaenga'."
"Dika neko ta' ngajari tengka teppa' ka na'
potona. Mon kalero atengka, Dika ta' narema dha' oreng laen."
"Dika ja' bannya' banta. Mon lakar angko. Bula
labanna Dika."
"Dika neko nangtang bula gi."
Kabadha'an e kennengngan ka'dhinto ampon bannya'
oreng-oreng se ngabasagi. Se kadhuwa saleng panglo tor nyala'agi.
"Tang ana' ampon daddi sakerra' daging e dhalem
badanna Bula. Se bangal nyake'e, artena maloka kole'na Bula."
"Eyatore, mon enga' ganeko carana dika arabat
na'-poto."
"Buru ngarte Bula. Baddiyanna tengkana Dika enga'
neko, gi?"
"Dika ja' pang-gampang melle oca'na na' poto se
kalero atengka ta' bagus ka oreng laen."
"Tang potra ta' kera lecegan. Dika lakar bi-talebbi
ban korang ajar."
"Eyatore tanya'angi sabendherra. Amarga Dika reng
seppona. Ja' jar-ngajari parkara se ta' bendher."
"Tang potra ta' kera lecegan. Dika lakar kodu
epaenga' sopaja ta' ban-saromban."
"Bula ta' lebur atokaran ban tatangga. Nangeng
mon Dika maksa, eyatore! Bula ta' kera nyorot pole."
Padha ta' kellar norodi nafso, Bunadi ban Meskut
acampo epenggir jalan. Mola-mola, se kadhuwa abuwang caca. Ranyeng tor lanto
kantos ekaedhing ka jauna.
Oreng-oreng gun ngabas. Kabbi padha tako' se nyandherra
tor se ngalanga. Asabab, se kadhuwa saleng ngamok akaton padha kasetanan.
"Pojurra, sala settong tadha' se nyambi sekep," ca'na oreng se nenggu e
kennengngan jadiya.
"Iya, ja' senga ano. Dhu, Pora Allah. Ta' magga
engko' se ngabassagiya."
Ta' abit, Bindara Halil lebat. Ngabassagi bannya'
oreng akompol. Salerana takerjat.
"Ba, ba, ma' ta' ealang. Ma' gun eyabasagi. Duli
mara banto sengko' alang-lang," saodda ka reng-oreng.
Oreng-oreng se gella' gun coma nenggu, kalowar abanto
neggu' tong-settongnga sopaja ta' acampo pole.
"Dantos gallu. Ba'na arapa ma' daddi atokaran e
dhinna'. Badha masala apa," saodda Dara Halil.
"Abdina ta' tarema tang ana' ekol-pokol sareng
Bunadi. Sanajjan sala, na'-kana' kene' ta' kengeng epanga' ganeka."
"Bunadi, Ba'na bendher mokol potrana
Meskut."
"Bunten, Bindara. Ka'dhinto Meskut kalero maksod.
Sanyatana, abdina ta' pang-gampang mokol potrana oreng sanajjan badha
kakalerowan."
"Nangeng aba' ta' ngarte. Meskut pa'-dhapa'na
langsung nangtang atokar.
"Ka'dhinto lecegan, Bindara. Tang potra abdina esake'e
sareng Bunadi."
"Tang budhu' abdina mator dibi' dha' abdina, ja'
etampeleng sareng Bunadi."
"Tape ba'na ta' langsung melle oca' dhari
potrana, ya?"
"Bunten, Bindara!"
Bindara Halil nyo'ona dha' ka oreng-oreng sopaja
enggal bubar. Salerana adikane se kadhuwa kaangguy ta' eterrosagi atokaran.
"Duli bubar kabbi, ja' toro' nafso setan,"
Saodda.
*
Dhapa' ka romana, Meskut toju' e palemperra. Aba'na
gi' aromasa ta' tarema kadaddiyan se badha. Pekkeranna ajalan kassannagi.
Kantos aba'na ta' sadar, ja' e seddhi'na badha ana'-na.
"ba, ba'na, Cong!"
"Enggi, Pa'."
"Oddi careta'agi pole. Baramma kadaddiyan se
ongguna."
Potrana mator pan-saponapan kadaddiyan kasebbut.
"Abdina etamper sareng Bunadi, Pa'."
"Arapa ma' bisa etamper."
"Bakto ganeka, Bunadi ajalan soko ban abdina ta'
asangaja. Ban budhi kateteyanna kaula tagenja ka aeng gellasan. Pas aeng ganeka
nampes ka badanna Bunadi."
Bunadi langsung ngoja tor namper abdina. E tempat
ka'dhinto sobung oreng sakale se ngoladi. Abdina tadha' se nolong.
"Kaula ampon asapora. Asabab, ta' nganiaja tor
asangaja."
"Baramma ca'na Bunadi."
"Nangeng Bunadi sobung banta. Kaula etamper
sakelarra."
"Abdina jugan epanglo tor epesowe kantos kalowar
ca'- oca' keban se korang pantes."
Ngedhingngagi potrana atotoran sambi' kalowar aeng
mata. Nyapcap ka pepena ban tanangnga.
"Ba'na korang ajar onggu. Bunadi!"
Meskut adarak, ngedingngagi totoran potrana. Aba'na
ta' narema tor ajanji bakal apareng babalas.
"Senga',
ekasangowa kantos mate mon ta' arassa alokae kole'na."
Fendi Chovi, Babbar e Kottha Songennep. Salerana lebur nganggit careta Basa Madura