Ebbun e baja laggu toron ka tengnga teggal e nalekana
sonarra are ta' kaoladan dhari ponca temorra langnge'.
Sabatara, reng-oreng mangkat alako nyare pangoreban
arassagi kabadha'an baja laggu se cellebba makobasssa e garassa ka badan.
E baja paneka, bindara Moji kaoladan rabu dha'
compo'na moredda. Ngoladi guruna alomampa tandu' ka romana, Salim duli ngala'
songko' celleng tor mateppa' sarongnga se ngalorsot gaggara.
"Ajunan Keyae." Salim nyandhak tor nyeom
astana keyaena, salerana sambi nondhu'.
Salim ngatore dha' keyaepon, kaangguy alonggu e korse
se badha e palemperra romana. Sabatara, aba'na duli marengkes pan-saponapan
barang-barang se car-kalacer e attas etto'na.
"Ba'na buru jaga tedhung, apa badha kalakowan
molae gella', Lim." Saodda, Keyaena atanya.
Mereng petanya kadi ka'dhinto, Salim coma mesem tor
nondhu'. Aba'na aromasa todhus kaangguy nyambadane petanya guruna.
Kabendherran, aba'na pajet buru jaga tedhung.
"Sopaja ta' lanjang parembagan. Engko' dhateng
dha' kennengan reya. Badha parlo ka ba'na. Pola ba'na badha tadha' acara."
"Bunten, abdina ta' gadhuwan acara, Keyae."
"Mon cara jareya. Mara duli asalenan. Angguy
sarongnga ban kalambina se bagus. Noro' sengko'."
"Engko' sateya eonjang oreng ka Mordhaja dhari
dhinna'. Rakera 30 Kelo jauna."
Salim ta' atanya tojjuwanna, tako' cangkolang, aba'na
sami'na wa ata'na dha' pan-ponapan se eatorragi Keyaena. Salim jaga dhari
korse, duliyan masok ka kamarra.
Sabelunna agante kalambi, aba'na massowe mowana ban sokona kalaban aeng jeddhing.
Saellana aba'na ranta asalenan tor sanat kaangguy
noro' ngajengnge keyaena, Salim kalowar dhari kamarra. Ropana e baja laggu
jareya, aba'na eajag guruna kaangguy nambai oreng sake' se badha e settong disa
ka bagiyan mordhaja.
Ropana, jalan kaangguy nojju dha' kennengan paneka
kabadha'an akadi gunung bina'nong bato kaletthak.
POLA KASOKAN MAOS JUGAN
- Puisi Madura: Bulan Gerring Pesse Panas
- Puisi Madura: Dudul
- ANJANGSANA D. Zawawi Imron
- Tase’ Tadha’ Omba’, Faidi Rizal Alief
- Cangka Asela
***
E romana oreng se kateban panyake' paneka. Salim asela
toju' e bingkengnga guruna, se gi' kaoladan emo' nambai oreng songkan kasebbut.
Ta' abit, ngalemba' e adha'na robana settong paraban
bine', ngaterragi biddang kobi ban jajanan jalabiya. Ta' dumadiyan, Salim
ngabassagi reng bine' nalekana kobi eangka' dhari talamma. Kadhang, aba'na tha-kantha
nondhu'.
E nalekana reng bine' kasebbut, nyengla. Laonan Salim
ngabassagi pajalanna tor robana dhari jau.
Sabatara, Keyaena kaoladan ngoro' badanna oreng se
katebanan songkan ekancae sareng towan romana.
Pangrasana atena Salim bida, atena ngaleser tapanggi
sareng babine' kasebbut. Kadaddiyan paneka, ta' ekaonenge guruna se gi' mijet
oreng se songkan.
"Saongguna, taretanna ba'na reya gun sake'
pekkeran." Laonan bindara Moji ajellasagi ka ale'na se paleng ngodha,
kabadha'an songkanna taretanna.
Oreng kasebbut, ta' nyaot. Sakejja'-sakejja' gun
aonggu'.
"Mara pajujur, pola badha masala laen sabellunna
se ba'na kataowe."
"Sapaonenganna badan kaula, Keyae. Kaka' rassana
ta' lebur agabay masala sareng oreng laen. Orengnga ta' pate lebur
acaca'an."
Keyae Moji noro' aonggu', e bakto mereng kateranganna
ale'na, menangka towan roma.
"Manabi ta' kalep, masala se seggut epekkere tang
kaka' coma settong. Nangeng kadinapa enggi, cara ajellasagina." Saodda
ale'na, sowarana akaton oreng ngetek.
"Masala apa jareya. Engko' olle tao?"
Bindara Moji nyambat pamanggina oreng kasebbut.
"Dhimen kaka' kaula majudhu potre epon, Nangeng epaburung ta' kalaban samporna."
"Baramma jareya, maksod dhari oca' epaburung ta'
kalaban samporna," saodda, bindara Moji.
"Bisan lake' ta' kasokan nerrosagi. Manabi
kabarra, badha settong dhuwa' tello' parembagan se korang paraddu."
"O, iya."
"Potrena tang kaka' saestona ampon dhapa' ka
omorra kaangguy akalowarga. Asakola' tor kuliyana padha lastare ajalane."
"Sapora, ya. Baja sateya, gi' tadha' reng lake'
maso' pole, ya."
"Sabatara, bunten, Keyae."
"Pola se gella' rowa ya, sengaterragi kobi"
"Enggi, lerres Keyae."
"Mon budhi are, badha se masok, pola etarema,
ya," saodda Keyae sambi' agellar.
"Manabi ganeka, abdina ta' bisa motos. Nangeng
ka'dhinto, sakabbina masala neka badha e tang ponakan. Asabab banne badan kaula
se bakal ajalane."
Bindara Moji, aonggu' ....
"Iya. Dina ja' mabaramma parkara jareya. Akabar,
ya."
POLA KASOKAN MAOS JUGAN
- Lalake’ Pajat Ta’ Kowat
- SKL STIDAR: Nyare Sango
- Petani Tembakau yang Jago Mendalang
- Jalan Terjal nan Berlubang Pedesaan
- Ajuwal Live
***
Saamponna eoro' sabadan, reng songkan neka aparenge
jamo tor amalan se kodu ejalane, "Jareya enom parutin, ya. Samoga daddiya
bukona tamba."
"Enggi, mator sakalangkong, Keyae."
Saellana para' satengnga ejjam, adha-kandha. Bindara
Moji ban Salim nyo'on edi paleman dhari kennengan paneka.
E dhalem parjalanan, nalekana palemana nojju dha'
romana Salim. Bindara Moji tor Salim adha-kandha e attas kateteyanna. Dhapa' ka
romana, Salim ngatore keyaepon kaangguy alonggu bisaos kaangguy maelang rasa
lesso tor kaso.
"Lim, kalowarga rowa saongguna paraten keya.
Ontong mon badha se ngaolle potre bine'na. Orengnga mon ca'na engko' bagus.
Keng kabadha'anna ta' pate sogi."
Salim aonggu' ban mesem, mereng pamanggi Keyae.
"Ba'na katonna sem-mesem dhari gella', Lim."
Esambat enga' neka, Salim ta' nyaman guli enneng.
"Baramma mon ba'na alamar, dina engko' se
nyareagiya pangadha'na," saodda bindara Moji sambi ngabassagi ka Salim.
Mereng dhabuna guruna, Salim nondhu' sambi sem-mesem.
"Ba'na reya na'-kana' parjuga. Penter. La dhapa'
ka baktona nyare mattowa. Ta' todhus, ya. Bila dhapa' baktona tellasan seggudan
toju' kadibi'an." Oca'na bindara Moji, agudha santrena.
Mereng dhadhabunna Keyae gapaneka, Salim coma mesem,
nondhu' toju' asela. Romasana aba'na, badan ban sokmana akaton ta' nyettong
pole, ngaleleng ka sakobangnga alam dunnya. Asabab atena ce' bungana mereng
dhabuna Keyaena.
Kampong Tajjan, 29 Maret 2025
*Fendi Chovi, babar e Songennep. Lebur nganggit
careta. Pan-saponapan ongkas serradanna terbi’ daddi buku, ngombar e media
cetak tor online. Eyaatore akanca lebat sosial media Instagram @fendi.chovi