Basa Madura (se saterros epon esebbut kalaban BM) paneka
kantos mangken gi’ badha dhalem jaman Basa Lesan, otaba basa se coma ebasa’agi
lebat lesan, esampeyagi lebat lesan, lebat pangocaban, hal ka’dhinto jugan ekalampa
e sadajana kaparduwan e Madura, akadiya Karja, Gabay, Salameddan, Onjangan, ka’dhinto
gi’ kalaban lesan, lalampan akadiya bila badha ceramah agama keyae, dhalem re-sa’are
jugan ta’ bida akadi paneka, ngangguy basa madura kalaban lesan.
Dhalem basa lesan bai, bannya’ se gi’ ta’ lerres
sorot-sanderra basa, akadiya teppa’an se gampang otaba kaca kebbang, enggi
paneka, “kaula neddha, sampeyan adha’ar” aneka se teppa’, bannya’ se elik-balik,
akadiya “Engko’ adha’ara, sampeyan ngakana” “kaula asaren, sampeyan ta’ tedhung
enggi” ban samacemma. Aponapa ma’ bisa kadipaneka, sampeyan kodu atanya ka aba’na
dibi’, Arabat Basa neka banne sakadar abukteyagi badhana Bangsa, tape nandha’agi
ja’ Bangsa tor Basana lakar ekaemba sareng magarsarena. Eatore pon lakone.
Manabi badan kaula, Mat Toyu, saestona ta’ gadhuwan
niyat se aceng-lecceng, berra’ tor pan-ponapan, saestona coma lebur ka Basa
Madura, pola asabab badan semma’ ka Basa Madura, agaja’, amandak tor ameler
(bercanda) kalaban Basa Madura neka paleng kobassa. Ngocol, Aberri’, Apora
aropa’agi ca’-oca’ se ngalotor sabban are dhalem gellar, gaja’, mandak tor
meler. Pantun, parebasan tor saloka neka’ daddi gu’-ganggu’ dhalem sabban arena
magarsare Madura.
Namong enggi, basa madura paneka gi’ ta’ daddi basa
toles, tor gi’ Badan Basa se khusus Basa Madura, Manabi Balai Bahasa Jawa
Timur, paneka ngaromat ban ngarabat tello’ kantos empa’ basa, Akadiya Basa
Madura, Basa Jaba, Basa Using tor Basa Sulawesi (Madura Kepulauan, se bannya’
oreng dhari Sulawesi, Bajo tor en-laen epon, e dhalem Basa Jaba dibi’ gi’
bannya’ macemma otaba dialek).
Tanto Basa Madura parlo tor buto akadiya Balai Bahasa
Madura, bisa jugan ta’ kodu pamarenta se neggu’, bisa jugan dhari Lembaga-lembaga
se pajat kasokan dhalem arabat, ngaromat tor mempromosikan tolesan Basa Madura,
akadiya Arsip Prosa Madura, Arokat Lalampan (lalampan.com), JP Radar Madura.
Kalaban badhana paneka, Basa Madura pendhanan ekagali tolesan-tolesan epon,
kadinapa carana noles, tor kadinapa tolesan se teppa’.
Enggi pajat kodu lelere aleyas lan-pelan, ta’ neng
laju berka’, akadiya Basa Inggris tor basa laenna, Basa Madura buru samangkenan
(sekitar 15 taonan ekarembak sopaja Basa Madura erabat onggu), dhari dhimen
paleng saestona pon badha se te’-nyelte’, sopaja Basa Madura paneka bisa
akadiya Basa Engris, minimal badha aturan grammar, tajwid otaba en-laen epon,
saestona pon badha, namong asabab pon sabban are ekabanta, daddina enggi nga’
garowa badhana.
Badha se noles kadipaneka “Mun nyaman kabele ka
tatanggeh, mun ta’ nyaman kabele ka buleh, urusan arge, ta’ kera tapeggeh.”
Serradan se lerres “Mon nyaman kabala ka tatangga, mon
ta’ nyaman kabala ka bula, urusan arga,
ta’ kera tapegga.”
Monyena “H” ka’dhinto namong dialek. TADHA’ TOLESAN SE
ABUNTO’ -H- DHALEM BASA MADURA. Tor bannya’ serradan-seradan se saestona ta’ lerres
dhalem panolesan, badha se noles kaper, baremma kaperra kana’, se lerres “Baramma
kabarra kana’?” manabi kaper neka enggi kaper (kafir).
Tolesan ka’dhinto coma bur-lebur, sapa tao pas bannya’
se lebur ka Basa Madura, sanajjan banne basa se bisa egiba ka lowar Madura,
akadiya Basa Inggris otaba basa laen epon.
Saka’dhinto Pamator, Cangkolan!!!
*Mat Toyu noles buku basa Madura: Embi' Celleng Ji Monentar, Kerrong ka Omba', tor jugan Ngejung saenggana ngaolle tandha Pangesto Yayasan Kebudayaan Rancage 2020 tor 2022.