SANGKOLAN
Angen nemor ce’ santa’na, angen se badha e polo
Kangeyan, asaloy kalaban panassa are se sajan tenggi. Dhadhuwa’ trek fuso lebat kalaban ambet, kalebbiyan buwadan,
se ebuwa’ bungkella kaju jate se ja-raja, sampe’ messinna adharak, kanalpodda
kalowar okos celleng, asaloy kalaban abu se egiba angen. Balikerra lorong aspal
car-kalacer amarga aspalla se korang bagus, ban lako elebadi motor raja.
Bel sakola’an
amonye, atandha ja’ pangajaran la mare, moret padha kalowar kabbi dhari dhalem
sakola’an kalaban perak tor bunga. Anis mamaso’ buku ban bulpenna se
car-kalacer e attas bangkuna, samarena pas laju asallem ka Pa’ Yasid, guru
kellassa. Anis mole abareng kancana. Rassa lapar ban pelka’ ella molae gella’
gi’ baktona maso’ sakola, sakeng eja-kaja
‘’ Assalamu’alaikum.’’ sowarana Anis abak epakaja,
ngolok salam eadha’na romana.
Tadha’ jawaban, ame’ ebuna laggi’ ta’ meyarsa. Anis
laju ngolok salam pole, tape paggun tadha’ jawaban. Anis ngabas e sakobengnga
bengkona se ekagabay dhari serap, eccedda se ella ambung, polana dhari kaju jate kalaban esaba’i kaca tebbel
se larang. Anis ngonju’agi nyaba kalaban mowa abak marengngo’. Ja’ sakenga
andhi’ roma bagus.
Anis mokka’ sapatuna, pas maso’ ka romana, kalaban
mokka’ labangnga sakaleyan laju adhardhar. Saellana nyaba’ bukuna se ebaddhain
palastek karessek, Anis laju maso’ ka dhaporra. Mangkana ebuna badha e
dhaporra, parappa’na amassa’.
‘’ Baaa …., la mole tang ana’ se manes,’’ ca’na ebuna
ka Anis sambi mesem. ‘’Lapar ba’na
Na’?’’ ca’na ebuna pole sambi nyothok
kaju k adhalem tomangnga.
Anis aonggu’ pas asallem ka ebuna.
‘’Eppa’ gi’ ta’
bubar enggi bu?’’
‘’Eppa’na ella dhateng, arowa eppa’na olle juko’. Se
mega’ ella massa’,’’ ca’na ebuna sambi aduding ka juko’ se badha e sogun..
“Sateya eppa’na nerragi juko’ ka bengkona bi’ Mone’, moga pas olleya pesse,
polana berras, mennya’ ban gula ella tadha’ kabbi.’’
Ta’ osa esoro, Anis laju nolonge ebuna agabay cenge se
ekasennengnge eppa’na. tape pekkerra ngaleleng ka monyena messin kaju jate se
badha e alas. Bannya’ kaju jate se epoger kalaban oreng se ta’ bisa tanggung
jawab, ban bisa andaddiyagi banjir. Motor trek ondur dhateng se ngone’e kajuna,
kalaban pesse se le-ngalle, dhari oreng settongnga ka oreng laen. Bannya’ alas
se ella gundhul amarga bungkana jatena eporop pesse juta’an ropeya. Sampe’
alassa aoba daddi lapangan.
Malem sateya listrik mate. Romana Anis padhana
koburan. Ta’ padhana romana tatanggana se andhi’ genset. Sanajjan laenna
petteng, tape tatanggana se settong jareya paggun tera’., Edhimma se bisa’a
melle messen genset juta’an ropeya padhana tatanggana, seddheng eppa’na Anis
coma tokang majang.
Listrik e Polo Cukir reya padhana mosem gembang, gun
odhi’ ebakto malem, kalamon seyang lampuna mate, tape ta’ saterrossa odhi’,
kadhang gi’ epabadha pettengngan agilir, dhari settong kampong ka kampong
laenna.
Kalaban damar talpe’ Anis bisa nera’e mowana aba’na
ban eppa’na, sambi ajar mateppa’ jaring juko’
‘’Pa’,……’’ ca’na Anis ka eppa’na.
‘’Badha apa Na’?’’ saodda eppa’na.
‘’Aponapa Eppa’ ta’ moger tor ajuwal kaju jate akadiya
eppa’na Mattra’i sareng eppa’na Simon? Kan kengeng obang bannya’ Pa’,, odhi’
ta’ pate nyangsara akadiya paneka?’’
Eppa’na anyaba lanjang pas ngabas ka pottrena se pajat
gun settong. Dhari pangabassa pajat ce’ neserra ka pottrena.
‘’Anis todhus Pa’’’
‘’Todhus arapa Bing?’’
‘’Anis terro gadhuwan compo’ bagus, akadiya compo’na
Mattra’e, manabi badha ca-kanca amaen, Anis todhus. Aponapa eppa’ ta’, kadiya
reng seppona na’-kana’ ka’dhissa’? Ma’ parlo majang?, Ponapa ma’ ta’ ajuwal
kaju bisaos?’’
‘’Alas ta’ olle poger sarombanan Bing, kalamon epoger
sarombanan bisa babaja.’’
‘’Tape eppa’na na’-kana’ ka’dhissa’?’’
‘’Arowa ngeco’, Nis’’
‘’Ngeco’?’’
‘’Iya, arowa ngeco’ e alas se ejaga nagara. Ngeco’
sangkolan na’ potona sengko’ ban ba’na, ngeco’ kandhangnga keban, ngeco’
somberra aeng. Se pajat gun bisa mabunga aba’ dibi’na, tape manyangsara ka se
laen’’
‘’Tape eppa’na Mattra’e ma’ kengeng moger kaju ngala’
sakarebba Pa’? Eppa’na Simon enggi jugan. Compo’na na’-kana’na gus-bagus, Pa’.
seddheng compo’na kaula paggun padhana paneka, dhari panggung, juba’ gi’ reyot.
Mattra’e sareng Simon manabi asakola bukuna ebaddhain ettas se bagus, seddheng
bukuna kaula baddhana palastek kressek. Sangona bannya’, kantos gi’ bisa
nyempen ka Bu Tutik. Pole Mattra’e bisa nyongngo’ TV e compo’na, Anis todhus
Pa’, ta’ kadiya na’-kana’ se laen.”
‘’Apa se ekatodhusa, Bing?’’ Ebuna mejil dhari dhalem
sambi nyambi kobi anga’. ‘’Sanajjan roma reya roma panggung, areya romana
dibi’, roma sangkolan dhari bangaseppo. Kodu rabat ban opene, se parlo bisa
notobi dhari panassa are ban aeng ojan. Pagi’ mon badha rajekke, mayu oba keya
papadha ban andhi’na tatangga,’’ ca’na ebuna Anis sambi nyaba’ kobina e adha’na
Pa’ Mattra’e lakena.
‘’Mon karebba oreng towa padha, Bing, terro mabunga’a
na’ poto kalaban roma bagus ban ta’ nyangsara,’’ nyaot Eppa’na Anis
Anis marongo’, laju egellu’ ban eppa’na
‘’Alas rowa sangkolan dhari bangaseppo, Bing. Osa jaga
ban osa rabat. Kalamon eppa’ ngeco’ kajuna, artena eppa’ ta’ neser ka ba’na,
pesse se ollena ngeco’ kaju rowa haram na’. Mon ekakan ba’na daddi daging
haram. Salaenna jareya kalamon epoger sarombanan bisa daddi banjir, tana gujur,
sowap ban samacemma. Sengko’ ban ba’na kodu bisa ajaga bume reya, polana alas
reya perro’na bume. Pole bume Indonesia’’.
Anis mekker, Anis enga’ ka panggibadda Alas erosak, se
eajari esakola’an
Ta’ sa’apa abidda badha monyena motor adharak. Anis
jaga ban nyorne’ ka monyena motor gella’. Badha motor SUV lebat. Ebagiyan
attassa badha lampu barna biru. Motor jareya ambu teppa’ e adha’na romana
Mattra’e, tatangga ban pole kanca sakellas. Toron ke’-lake’ tenggi raja
katello, maso’ karomana Mattra’e.
Mangkana eppa’na Mattra’e egiba ka dhalem motorra,
pole messen kajuna egiba maso’ keya ka dhalem motorra. Mattra’e ban ebuna
nanges acerreng, nyo’on sopaja eppa’na ta’ egiba. Tape oreng se katello ta’
akantha atole ka ebuna Mattra’e, laju mangkat maelang dhari tera’na damarra
Mattra’e
Dhari candhilana Anis nengale ban arassa peddi atena ngabas Mattra’e ban ebuna nanges, tadha’ se bisa’a abanto. Dhari jareya Anis ajanji ta’ maksa eppa’na kaangguy ngala’ kaju e alas pole. Anis aromasa ja’ odhi’na ella lebbi cokop etembang Mattra’e. sanajjan bengko panggung ‘’Rumahku istanaku’’.